| Yaaro Kisi Qatil Se Kabhi Pyaar Na Maango, Apne Hi Gale Ke Liye Talwar Na Maango; Gir Jaoge Tum Apne Maseeha Kee Nazar Se, Mar Kar Bhi Ilaaz-e-Dil-e-Beemar Na Maango; Khul Jayega Is Tarah Nigahon Ka Bharam Bhi, Kaanton Se Kabhi Phool Kee Mehakaar Na Maango; Sach Baat Pe Milta Hai Sada Zehar Ka Pyala, Jeena Hai To Phir Jeene Ke Izhaar Na Maango; Us Cheez Ka Kya Zikar Jo Mumkin Hi Nahi Hai, Sehara Mein Kabhi Sayaa-e-Deewar Na Maango! |
| Kabhi Khaamosh Baithoge Kabhi Kuch Gungunaoge, Main Utana Yaad Aaunga Mujhe Jitna Bhulaoge; Koi Jab Puch Baithega Khamoshi Ka Sabab Tumse, Bahut Samjhana Chahoge Magar Samjha Na Paoge; Kabhi Duniya Mukkamal Ban Ke Aayegi Nigaahon Mein, Kabhi Mere Kabhi Duniya Kee Har Ek Shah Mein Paoge; Kahin Par Bhi Rahen Hum Tum Mohabbat Phir Mohabbat Hai, Tumhein Hum Yaad Aayenge Humein Tum Yaad Aaoge! |
| Mil Bhi Jate Hain Toh Katara Ke Nikal Jaate Hain; Haye Mausam Kee Tarah Dost Badal Jaate Hain; Hum Abhi Tak Hain Giraftar-e-Mohabbat Yaaro; Thokarein Kha Ke Suna Tha Ki Sambhal Jaate Hain; Ye Kabhi Apni Jafa Par Na Hua Sharminda; Hum Samajhate Rahe Patthar Bhi Pighal Jaate Hain; Umar Bhar Jin Kee Wafaon Pe Bharosa Kije; Waqt Padane Pe Wohi Log Badal Jaate Hain! |
| Ye Din Bahaar Ke Ab Ke Bhi Raas Na Aa Sake, Ki Gunche Khil To Sake Khil Ke Muskura Na Sake; Meri Tabahi Dil Par To Reham Kha Na Saki, Jo Roshani Mein Rahe Roshani Ko Pa Na Sake; Na Jaane Aah! Ki Un Aansuon Pe Kya Guzari, Jo Dil Se Aankh Tak Aaye Mishgaan Tak Aa Na Sake; Rahen Khulus-e-Mohabbat Ke Haadsaat Jahan, Mujhe To Kya Mere Naqsh-e-Kadam Mita Na Sake; KarenNge Mar Ke Baqa-e-Dawaam Kya Hasil, Jo Zindaa Reh Ke Muqaam-e-Hayat Pa Na Sake; Naya Zamanaa Banane Chale The Deewane, Nayi Zameen, Naya Aasmaan Bana Na Sake! |
| Main Bura Hi Sahi Bhala Na Sahi, Par Teri Kaun See Jafaa Na Sahi; Dard-e-Dil Hum To Un Se Keh Guzare, Gar Unhone Nahi Suna Na Sahi; Shab-e-Gham Mein Bala Se Shugal To Hai, Naala-e-Dil Mera Rasa Na Sahi; Dil Bhi Apna Nahi Raha Na Rahe, Ye Bhi Ai Charkh-e-Fitnaa-Zaa Na Sahi; Dekh To Lenge Wo Agar Aaye, Taaqat-e-Arz-e-Muddaa Na Sahi; Kuch To Aashiq Se Chhed-chhaad Rahi, Kaj-Adaayi Sahi Adaa Na Sahi; Kyon Bura Manate Ho Shikwa Mera, Chalo Be-Jaa Sahi B-Jaa Na Sahi; Uqada-e-Dil Hamara Ya Kismat, Na Khula Tujh Se Ai Saba Na Sahi; Vaaizo Band-e-Khuda To Hai 'Aish', Hum Ne Maana Wo Parasa Na Sahi! |
| Ishq Kee Duniya Mein Ek Hungama Barpaa Kar Diya; Ai Khayal-e-Dost Ye Kya Ho Gaya Kya Kar Diya; Zarre Zarre Ne Mera Afsana Sun Kar Daad Dee; Main Ne Vahshat Mein Jahaan Ko Tera Shaida Kar Diya; Toor Par Raah-e-Wafa Mein Bo Diye Kaante Kaleem; Ishq Kee Vusaat Ko Masdood-e-Taqazaa Kar Diya; Bistar-e-Mashriq Se Sooraj Ne Uthayaa Apana Sar; Kis Ne Ye Mehfil Mein Zikr-e-Husn-e-Yaktaa Kar Diya; Chashm-e-Nargis Jaa-e-Shabnam Khoon Royegi Nadeem; Maine Jis Din Gulasitan Ka Raaz Ifsaa Kar Diya; Mudda-e-Dil Kahun 'Ehasaan' Kis Umeed Par; Wo Jo Chahenge Karenge Aur Jo Chaha Kar Diya! |
| Khayaal-e-Husn Mein Yun Zindagi Tamaam Hui, Haseen Subah Hui Aur Haseen Shaam Hui; Baqaar-e-Ishq Bas Ab Sar Jhuka De Kadamon Par, Udhar Se Tere Liye Sabaqat-e-Salaam Hui; Har Ek Apni Jagah Khush Har Ek Yahi Samajha, Nigah-e-Khaas B-Tarz-e-Nigaah-e-Aam Hui; Nazar Mili To Tabassum Raha Khamoshi Par, Nazar Phiri To Zara Himmat-e-Kalaam Hui; Bas Ab To Tum Ne Mohabbat Ka Le Liya Badla, Maaf Karna Jo Takleef-e-Inteqam Hui; Hai Dekhne Hi Ka Waqfa Jise Samajhte Hain, 'Raza' Wo Dhoop Chadhi Din Dhala Wo Shaam Hui! |
| Uljhe Na Zulf Se Jo Pareshaniyon Mein Hum, Karte Hain Is Pe Naaz Ada-Daniyon Mein Hum; Saragarm-Raqs-Tazaa Hain Kurbaniyon Mein Hum, Shokhi Se Kiski Aaye Hain Jolaniyon Mein Hum; Sabit Hai Jurme-Shikwa Na Zahir Gunahe-Rashq, Hairan Hain Aap Apni Pareshaniyon Mein Hum; Maare Khushi Ke Mar Gaye Subahe-Shabe-Firaaq, Kitne Subuk Hue Hain Garaan-Jaaniyon Mein Hum; Aata Hai Khwaab Mein Bhi Teri Zulf Ka Khyaal, Betaur Ghir Gaye Hain Pareshaniyon Mein Hum; Dekha Idhar Ko Tune Ki Bas Dam Nikal Geya, Utare Nazar Se Apni Nigahabaniyon Mein Hum! |
| Din Muradon Ke Aish Kee Raatein, Haye Kya Ho Gayi Wo Barsaatein; Raat Ko Baag Mein Mulaqaatein, Yaad Hain Jaise Khwaab Kee Baatein; Hasratein Sard Aahein Garm Aansu, Layi Hai Barshagaal Saugatein; Khwar Hain Yun Mere Shabaab Ke Din, Jaise Jaadon Kee Chandni Raatein; Dil Ye Kehta Hai Kunj-e-Raahat Hun, Dekhna Gham-Naseeb Kee Baatein; v Jin Ke Dam Se Shabaab Tha Zinda, Hai 'Akhtar' Wo Ishq Kee Ghaatein! |
| Ye Keh Gaye Hain Musafir Lute Gharon Wale, Dare Hawa Se Parinde Khule Paron Wale; Ye Mere Dil Kee Hawas Dasht-e-Be-Karan Jaisi, Vo Teri Aankh Ke Tevar Samandaron Wale; Hawa Ke Haath Mein Kaase Hain Zard Patton Ke, Kahan Gaye Vo Sakhi Sabz Chadaron Wale; Kahan Milenge Vo Agle Dino Ke Shehzade, Pahan Ke Tan Pe Libaade Gada-Garon Wale; Pahadiyon Mein Ghire Ye Bujhe Bujhe Raaste, Kabhi Idhar Se Guzarte The Lashkaron Wale; Unhi Pe Ho Kabhi Nazil Azaab Aag Ajal, Vahi Nagar Kabhi Theharen Pyambaron Wale; Tere Supurd Karun Aaine Muqaddar Ke, Idhar To Aa Mere Khush-Rang Pattharon Wale; Kisi Ko Dekh Ke Chup Chup Se Kyon Hue 'Mohsin', Kahan Gaye Vo Iraade Sukhan-Varon Wale! |